WEIHNANCHTE
IN DE KOLONIE
Mia honn jo ganz in de
Kolonie gewohnt, un wohre oach so ormche. Mia wohre viel Kinna im Haus, awa es
woa doch imma scheen; hauptsechlich wenn so grosse Toche wohre wie Weihnachte
odda Oschtre.
Mia kunde net grosse
Sache mache, awa, honn uns doch so gefreit wenn ma em kleen Geschenkche griet
honn. Vielmols woa es blos bische Schokolode odde em Oschtreei. Das woa schun en
Grund fa sich so se freie dass ma gesun hat. Die Mamma un de Pappa hatte net
viel fa fein Esse mache, awa manichmol homma doch en Schweinche geschlacht un
Woscht gemacht. Das schun poo Toche voahea. Zwei Toche voa de Weihnachte hat
die Mamma Toss gepackt; mea muste das Holz bei schaffe un de Packhofe scheen
heis mache. Alsmol hat es net richtich gebrennt, dann homm ma mit samme
gegrintz un dischkutiat, awa ma honn es doch hin griet. De letschte Toach voam
Heiligeohmt dann hat die Mamma noch Kuche gepackt. Barbaridade! Dea hat so gut
geschmeckt. Ma must awa watte bissa rischtich kalt woa fa se esse. Die Mamma socht
dess heisse Kuche tet Leibweh gewe. Un mea hatte ach vielmos son Panzweh. Das
hat alles dezu geheat. Un so voa Ohmt, dann is de Krissboam gemach woa: so en
Pinhebemche is uffgeschtellt woa, scheen beschmickt mit Kuchelch, Kette un Ketzja.
Dann woa die Freide gross.
Was oach imma dezu geheat
hat woa in die Kerich gehen. Die meascht mol sin die Buwe in die Kristmette
gang. Die woa in Mittenacht, un die Kerich woa net dicht. Das hat alles Nicks
gemach. De Pappa is im Toach in die Kerich gang. Die Mamma kund net imma mit,
weil sie musst doch die ganz Arweit mache. Wenn awa Mess in de Kapell woa –
dichta bei uns – dann is sie oach gang.
Um die Zeit hat keine Televissão
un Radio – naja, mea hatte son Ding wo vielmos blos gerauscht hat – hon mea net
so viel geheat. De Pappa un die Mamma honn Geschictcha votzeelt vun fria un wie
sie die Weihnachte in ihre Familie gefeiat hette. Alsmol honse Weihnachtslieda
gesunn. Das woa so scheen! Heit is das alles vorbei. Die Junge wisse gonet me
wie das Lewe fria woa, un wie die Familie in Friede das Kristkind gewat hot.
Sicha is das Jesuskind bessa oangenomm gang in de Einfachkeit wie heit in alle
Schmuck un reiche Geschenke.
Frohe weihnachte, mit dem Gottessege.
