Scheene Weihnachtszeit

WEIHNACHTE IN DE KOLONIE

Wie mea noch Kinnacha wore do wo es doch alles viel anneschta. Mea hon doch in de Kolonie gewohnt, wo doch die Leit all ormche wore awe doch zu friede, un aach gut religiesich. In de selwiche Kolonie hon Katholische un Evangelische Familie beisamme gewohnt. Die Kinna hon imme mit samme gespielt un die grosse hon sunntachs do gehuckt un Schimaron gelapscht. Iwe alles is gesproch geb, iwas Wetta, iwa das Vie, iwa Gesundhet, un aach alsmols iwa Religionsgeschichte. Wenn die Weihnachtszeit kum is do hon di Kinna jo doch viel vun de Geschenka gesproch, wose grin solte wenn se sich gut geschickt here. Dat wo alles spannent. Die Eltere hon aach Plene gemach wie sie in die Kerich kehme: die katholische in die Mess un die Evangelische in de Gottesdienst. No dem hon se aach gepleent was desse packe teere: Kuche, Toss, Weissbrot, un epse va das Mittachesse en Schuraske odda en Galinhode mache teere. Wo en Familie woa wo net gut dran wo, do honse sich samme gemach un hon denne aach en stick Fleisch odde Weissmehl rumiert, fa dass keene ohne Weihnachte geblieb is. Das woa doch so scheen!

En odda zwoi Toche foa de Weihnachte is das Kristbeimje gemach woa. Do is alle Schmuck drohn gehonk woa: Kuchle, Kette, Ketzja, Farwichespapia, un noch viel Aneres. Uff de Heilicheomht sin dan die Leit in die Kerich. Das woa doch die grescht freit fa die Kinna un fa die Juchend. Schun lang defoa des die Kerich on gang is wore se dat. Die Kinna sin dorum geschprung, un die Junge hon sich getroff fa se prose un aach fa bisje riwa un niwa no de Med ze gucke. Das woa alles so pua un rein; do hot keine Schlechtichkeite in Sinn gehat. Fa de Kinna die Geschenka se brenge honse vun Kristkinntje gesproch. Dea Weihnachtsmann is im zweite Platz geblieb. Die Kinna hon das gleich gewuscht des Weihnachte dem Kristkinntje sei Geboatstoach is, un des das es Haupte vun Fescht is. Wenn die Kinna dan nachts am schlofe wore is das Kristkinntje komm un hat die Geschenka uff de Tisch gelecht odda unna das Kristbeimje. Moiens wenn die Kinna uffgestie sin un hon dan die Geschenka geguckt, do woa blos noch Freit. Wenn das aach blos Kleinichkeite wore, awa fa die Kinna woa das alles gut. Die Mamma hat de Kuche ferschnitt un en gute Kaffi gemach. So Erlebnisse hatte die reiche leit siche net! De ganse Toach dorich wore die Leit froh: hon sich besucht un gut gess.

Schoot dass es nimma so is. Heitsentoche schpreche die Leit jo blos noch vun Papainoel un uff dea grosse Toche tunse sich vollfresse un vollsaufe, un keine kimmat sich um de Neschte. Die Kinna tun konet me mit samme so einfach spihle, sin doch blos noch me am Komputadoa. Un das Kristkinntje is gans vorgess!

Weihnachte wore gute un scheene Zeite!

Glaabmário

www.marioglaab.blogspot.com.br