Hunsrickischegeschitje

DAS GESPENZT UFF DEM FRIEDHOF

Drowe in Brunkepikot is das mo passiat, dat wo so’n grosse Friedhof, und die Leit hon imme gesaat dat wea so geferlich owends do dorich se laafe: do were Gespenzte wo die Nachtleifa verschrecke un noch springe mache teere. De Gustavpitt, woo oach in de Nee gewont hat, de hot jo doch imme gesaat dat wea blos Licherei, un er het doch kei bisje Bang von de Todde. Saat imme er het Kurasch fa in der Mittenacht beim Friedhof vobei se geen, un ted noch sei Liedje singe, As mocinje da cidóde… Awe de Reinoldhannes, dat woa son schlimme Mann, wen de Jimand was oanstelle wolt, dan horra es aach gemach das es gelunge sollt. De Reinoldhannes soat iwa de Gustavpitt “Pass dich mo uff: beim Friedhoff deff ma net Nachts rum laafe, do sin schreckliche Gespenzta. Ich wollt mo sien wie das du fertich werre teest wen son Biist dich voa die Naas kemt!”, horra gesaat. Das hat dem Gustavpitt alles kei Bang gep. Hot blos gelacht un poque case demit gemach. Do hot de Reinoldhannes sich mo was geplent.

Er wust jo wan de Gustavpitt owends uff de Stross rum gelaaf is un bei dem Friedhof vobei gan is. Een schene Nacht hat de Reinoldhannes fa sei Fraa gesaat das er noore speete hem kemt. Hot mo sei alt Schwiegermodde ihre alt weis Kleit gesucht un is demit zum Friedhof. Hot sich scheen versteckelt hinna de Krewa. Er selbst hat bisje Bang, un jede Tritt uf dem weiche Land hat ihm in de Bei gezittat. Dat woa alles so ruich, er hat blos die Krickelmeisja geheat. Barabaritode, horra so helich fa sich gedenkt, hat sich awe net gewinne geloss. Sei Plon must zu Ende gehn. Mit eens hat er awe net gerechent: de Gustvpitt wo groat uff dem Toach mit sei Gaul in die Poteke gerit un kemt montode.

Wie das so weit woa do hot uff eemol de Reinoldhannes dem Gaul sei trample geheat; um aach gleich die Stimm, wo er so gut gekent hot. De Gustavpitt wo hat am singe, “Eins gin ich am Uffer des Rheins, da fand ich mein Liebche allein…”, das hat geschalt in der Nachtluft. Gans genau wie die Stimm so voam Friedhof wo do is de Gespenztmann raus gehupst un mit dem weisse Rock in de Luft geschwenkt. Hot aach noch debei gekrumt wie en Stie wen er bees un hunrich is. De gute Reita, wie er iwerrascht wo is, hat sofot uffgeheat se singe: een klene Schreck, awe net so schlimm. Hot mo de Gaul am Zohm veschtgehal un mo bisje gedenkt. Un uff eemol! Uff eemol nemt er jo doch de Rabodetatu, wo noch gans nei woa, un reit zum Gespenzt hin. Hot geschreit: “Jetz will ich awe doch mo siin ob en Gespenzt net se haue is”. Dat hot blos noch me so geflatscht. De orme Reinoldhannes is geschtolpet un das weisse Kleit issem runne gefal. Die Beitsch hat geknalt uff seim Buckel. Wie er mea oanhald das de Gustavpitt nolosse sollt, desto mea hat de sei Spass um druf se haue. “More, deskrassade”, horre geschreit, “ich will doch mo sien wea das do drunne steckt”.

De Reinoldhannes must springe bis heem, un solang wie er net de Tea nin gesprung is hot sei Buckel kei Ruu griet. Das Gespenzt woa mo vorot, un die Leit hon sich lechlich gemach. Dem Gustavpitt sei Kurasch is in alle Ecke verbreit geb. Un die Lei thon gesaat man solt de Friedhof net desrespecktiere, awe do were doch kei Gespenzte. Die orme Seele wolte blos Gebete, un tere de Leit nicks Beses mache.

Mário Glaab

www.marioglaab.blogspot.com.br