Hunsrickischgechitje

DAT JUNGE PODDACHE UN SEI PREDICHT

Die junge Poddre, die wo noch kei Sperienz hon, die tun alsmo net so richtich raus kume. Do is es mol passiert das groat so’n junges Poddache in en Gemeind kum is un dan wolt ea aach mo de Juchend en scheen Predicht voa halle. Die Buwe un die Med sen samme gelaaf um dat Poddache se hehre. De hot dan mo fix oangefang. Hot’s Jeckche scheen richtich getzoh, die Luft tief ingetzoh, un gesaat: “Mei liewe Buwe un Med, mea misse uns in Acht nimme. Die Televisson, de Radio un die ganz Mentalitet zeicht uns imme noore das Auseres, mea solle awa aach bische tiefe rin gucke in die Sache, sonst bleibt ma blos uff de Schoole. Zum Beischbil: wenn mea so’n Medche siehn solle mea doch net blos das scheene Gesicht, die scheene Aue, das scheene Kleidche – alles was ause is – oangucke, awe mea misse mol bische gucke was drunne is”. Dat woa awa wie geschoss! Die Juchend hot all oangefang se lache, un hon gesoat: dat junge Poddache hat uns mo gelent wie mea richtich ze tun hon”. Awa das woa oach net so slimm, die Haupsache woa des se all mo gelacht han, un das es gedient hot das es Poddache sich bessa uffpasse tut in de Zukunft fa net nommo dumme Sache voa de Leit se san. Die Sperienz un dei Demitichkeit is viel Weet.

Glaabsmário

www.marioglaab.blogspot.com.br