IN DE KATEKISMUSUNNERICHT
Dat Fritzje wo doch imma son traurich Guriiche, dat
hat jedem die Nerven uff di Haut gebrun. De Podda, wo son strenge Mann wo, de
hot oach seine Last mit dem Fritzje gehat. Wat dem Geistliche doch gonet gefal
hot dat wo des das Fritzje imma so mit sei Hund dorum gestribt is. Dat Fritzje
un de Pororoo, wie de Hund gehees hot, die woore doch nie weit vonanna. Wo dat
Fritzje hin is, do wo aach de Pororoo dehinna. De Pfarr soat imma: “Loss doch
de stingiche Hund dehem!”, awa das nutz iwahaupt nicks.
En scheene Toach woa Katekismusunnericht. De Podda hot
die Kinna in die Kerich geruf un hot dan mo oangefang se parlamentiere. Dat
Fritzje hat ruich do gehuckt. Es hat net lang gedauet, un de Hund woa oach
schun unna de Bank. Dat wo doch zu viel fa de Vigario. Ganz bees horra gefroat,
un aach schun nohm Fritzje geguckt: “Warum is schon witta de stingiche Hund in
de Kerich?” Die Kinna hon sich all oangeguckt un gelacht. Dat Fritzje is awa
dann mo uffgeschtie un hot geantwot: “Ei, herr Pfarra, de Pororro is in de
Kerich weil die Tea uff geschtan hot. Dat is doch leicht se veschteen”. All hon’se
gelacht, blos de Podda is enscht geblieb.
Dat wo halt mo so. Die Hunn solle jo dehem bleiwe, awa
wen’se de Guriizade noch lowe in die Kerich, dat is oach net die End de Welt.
Glaabsmário
Nenhum comentário:
Postar um comentário