DIE
BLUME BRAUCHE NET SCHEN SEN WEIL SIE ES JO SCHUN SEN
Vielmols passiat bei de
gute Leit in unsa Kolonie des ma enfach spiert dass was ma lebt etwas Gutes is.
So oft mache die Leit Sache wo die gelehrte Mensche iwahaupt net bekeppe. So
orme un net gelernte Koloniste hon doch vielmols mee gute Sache im Hetz wie die
wo doch blos Wille hon awa kei Finga krum mache fa etwas Gutes tun. Wenn in
unsa gute Kolonie mol ene krank is oda hot en Problem, do tun doch gleich die
Nochbaschleit sich samme mache, un helfe.
Mea hatte en eltere
Mann in de Gechend, dea hot so vieles Gutes getun; hot ach de Leit viel
Guteswort gewe, un alles interpretiert, un en gute Sinn rausgehol. Ea is mo
gefrot gep wie das wea des die enfache Leit so Gutes un Schenes mache tere, un
die Grossartiche doch blos Schweinerei samme brenge tere? De gute Mann hot net
lang nogedenkt, hot dan mo parlamentiert: “Das is so: die Blume brauche net schen
sen, weil sie es jo schun sen”. Dan hot ea es erklert: “Die orme Leit vun unsa
Kolonie, die brauche sich net gut un schen mache, weil sie es jo schun sen. Unsa
Leit hon das Gutes un das Schenes insich. Die Grossartiche hon jo doch blos
schlechte Gedanke im Kopp, wolle die Annere ausnutze un oanscheisse mit erre
Geschefte. Ma muss sich hite von so Mensche, un muss imme zusamme halle. Dan
bleibt Gott bei uns un kei Gaune kann uns klein mache.
Orich schen Baispiel.
Wenn die Juchend das oach heit bekeppe tet, dan wer die Welt doch noch besse.
Glaabsmário.
Nenhum comentário:
Postar um comentário