DAS
MODENNE LEWE
Wie die Modennheit in
die Kolonie kum is do is jo Alles annesta gebb. Friia do hot ma jo das Lewe mit
Gemitlichkeit oangesihen. Speta is das jo imma schlimma gebb mit dem Rasen.
Keine kan jo me gemitlich sei Schimaron trike un iwa das Wetta spreche; es
heist imma ma muss sihen dass georwet wet, um dass die Zeit benutz wet. Zeit,
son’se, is Geld. Oje, das losst die Leit ganz varickt. Un dan, im dem
Corre-corre tun se jo die Helft vergesse, die scheene Sache vun Lewe iwahaupt.
Uff emol hot doch de
Fritz vun Capiroweberg mo de Pinhonleopold in de Wende oangetrof, dat in
Statplaz, wo die Leit jede Wuch mo hin sin fa erre Geschefte abmache. Wie sie
sich gegrist han do hat de Fritz an dem Leopold sein Finge en Zwennfoden
oangebun gesihen. Hot ach gleich mo gefrot: “Na, warom hoscht du em Foden an
dei Finge?” Dan hot de Leopold erklert: “Ja, das hat mei Frauche gemach; dat
solt sen dass ich net vergesse tet de Brief wo sie fa unsa Rudi geschrip hot
uff die Post se tun”. “Naja, un hoscht du ihn schun abgeschickt?” frot dan de
Annere. De Leopold lametiert: “Gut, ich wolt es jo mache, awa mei weib hot jo
doch vegess mir de Brief mitgewe”.
Da is alles Konsequenz
vun dem Votschrit. Die Modennezeit tut die Leit all dum un vergess losse. Das
Lewe is modenn, awa ich meene sie wea net me so schen um lustich wie um die
Zeit wie es woa wie die Televison, die Komputas, um die Internet noch net uff
de Kolonie existiert hot. Imma mea veliert ma die lustiche Sache wo die Familie
so reich gemacht hot. Das is halt mo so in dem modenn Lewe.
Glaabsmario
Nenhum comentário:
Postar um comentário