Hunsrickischgeschichtje

DIE GROSS ODA DIE KLEIN GLOCK?

Dat Geschichtje wo ich eich heit vazehle will, dat iss passiert in dea letschte Zeite wo die oanstenniche Gewohnheite schun nemme so gebraucht sen wie frie. Uff dea Kolonie komme die Sache vun dea Statt, so die Ongewohnheite, oach hin. Die junge Leit tun dat alles noch mache was sie in dea Televison sihn un in dem Radio hehre. Ach die Internet iss schun uff viel Pletza. Do iss jo Gutes druna, awa dea meascht mol aach viel Schweinerei. Un dat tut sich zwische dea Juchend gleich verwotzle.

Mea han doch so en Podda wo en recht gute Mensch iss. Ea will doch die gute christliche Gewohnheite net verloa gehn losse. Dat kommt ihm awa imma schwere. Fa die junge Leit bische se verschrecke otha voar dekretiert: “wenn in meine Kerich en Heirat iss, un die Brautleit oanstennich sen (noch net bei samme lewe), dan wet die gross Glock gebimelt; awa wenn se schun dea Nohdisch voahea gess hon, dan wet blos die klein Glock gebimelt!” dat sollt mo die Leit in Acht mache. Jedes mol wo en Bub un en Medche komme fa die Nome se gewe fa se heirate, do frot de Podda ob ea die gross Glock bimle kann oda blos die klein. Do wisse die Leit schun bescheid was er meent. Wenn dea Podda so die Peache voa sich hat un frot, do tun Manniche sich inziche un merke dea kalte Wint unna dea Hoose blose. Lieche, dat kinne’se oach net, weil speta kommt es jo doch raus. Dann iss es noch eglicha; dann misse se sich noch mea scheeme.

Die Toche iss doch passiert das dem Prefeckt sei Tochta heirate wollt. Sie hat so’n Kerl vun dea Statt; so eene wo doch blos Brasilionisch spreche Will; un ob ea was schaffe kann, das weis man net. Dea Prefeckt iss dann mit dem Peache bei dea Podda kum. “Gumoin”, ota gesaat, “Herr Podda, iha wet jo schun wisse wat mea wolle: es soll een gross Hochtzeit gewe. Mei lieb Tochta hat sich en reiche Jung vun dea Statt oangeschafft, un im nechte Monat wolle se heirate”. Dea Podda woa schun desconfiiat dass das net es Beschte wea, awa ea wuscht aach net so richtig sich se behelfe. Genn het ea jo gehat wenn dem Prefeckt sei Medche sich een emfache Bub vun dea Gemeinde ausgesucht het fa se heirate, dat wea viel besse gewescht. Awa was mache? Dann hot ea awa mo stramm gefrot: “Bei der Hochtzeit, kann ma die gross Glock bimle, oda blos die klein?” Dat woa wie kalt wasse uff dea Prefeckt geschut. Die Junge honn blos so dumm do gestann; doch dea Vatte hot geantwot: “Awa doch sicha, die gross Glock!” Dat Peache hot sich schun wie Kenich un Kenichin gefihlt; doch dea Podda woa net zefriede. No en kotze Zeit hot ea nochmol gesproch: “Seid iha sicha mit dea Sache? Iha wisst wie das funtioniert mit der Glocke. Ich will net speta hehre dat ich dem Prefeckt sei Tochta voagezoh hann. In meine Kerich sen alle Leit genau so trancktiert: keine iss mea oda wenicha wie dea Annere”. Un frot jo wiete: “Die gross oda die klein Glock?” Do hat dat Medche oangefan se kreische; dea Papa iss rot gebb, un noh enige Segunte sot ea dann: “Wenn es halt sen sollt, dann kann dea Podda jo die gross Glock bimle, awa aach die klein kann bisje ninn gebimelt were. Ich glawe selwa net dat das Alles so stimmt wie dea Podda un die Kerich es hon wolle”.

Wie dea Toch von dea Hochtzeit kumm iss do hon halt die zwei Glocke gebimelt. Die Leit hon sich bewunert dass dea Podda son saiide gefunn hot. Hon All so helich fa sich gedenkt: wenn doch blos die Brautleit bei samme bleiwe. Was schun rum iss dat intressiert jo nimme; mea brauche gute Familie wo die Kinna gut ziehe un gute Beispiele gewe. Uff dea Hochtzeit wohre se All froh, aach dea Podda. Dea Prefeckt woa so froh dass ea die Geschichte vun dea Glocke gans vergess hot.

Was gebt dat blos wen in dea modern Zeite die Poddre das all so mache wollte: do tet ma jo doch die grosse Glocke iwerhaupt nimme hehre!

Glaabmário