sábado, 18 de agosto de 2012

Historinha em Hunsrick

DEA MUHLE WO NET ME GEFRESS HOT
Dat Geschichtje wo ich eich heit votzehle will das is jo passiert um die Zeite wo die Leit noch net so gescheit wore wie heit. Oje, Heitzenstoache do wisse die junge Leit schun alles; ach das wose net wisse solte. Un die measchte hon ach kei Respeckt me hinna de Ohre ode iwan Nawel: die hucke jo doch blos me an de Internet, voam Televisson oder sin am oanstelle uf de Stross. Wense mo solle faninftich spreche mit eltere Leit, dan komt doch blos Dummes raus. Awwe was ich votzehle will das is mit son enfache Mensch passiert wo net so gescheid woa, awe gut war, weil ea hat keine schlenchte Gedandke im Kopp.
Wie frie die Zeite net so gut ware, do must jo doch jede ene siin wira mit seine Orwet iwa die Probleme kome solt. Do hot uff dea Kolonie son orme Mann gewohnt wo en alte Muhle hat. Dea Muhle woa gut weil er doch viel Gewicht uf dem Ricke gedrohn hot: Kargere, Futta, un ach gedient hot zum reidde. Dea Muhle hat awe doch oach imme so viel gefress, un die Milie hon net iwa gestan. Uf emol is dem Mann mo Was ingefall: alles is doch Gewohnheit. Wen ene en schlecht Oangewohnheit hot dan mus man es ihn abgewehne. Das viele Futta wo dea Muhle fresst, das wet ach en Oangewohnheit sin. Dat mus abgewehnt were! Awe wie?
Dea Mann hot mo driwe nochgedenkt. Un uf emol es ea uf en Rot kum: Fa was abgewehne mus ma es imme weniche mache, solang bis es verschwind. Gut. Von jetz oan fot kriet de Muhle imme weniche Futta, bis ea es gans abgewehnt is. Ohme Muhle! Jede Toach sin ihm die Milie un das Kross wenicha woa. Dea Muhle must zufriede sin mit dem was er kriet hot. Zwei Woche speta hot de Muhle so traurich do gestan, un hot ausgesien wie wen ea krank wea. Dea Mann hot gedenkt: das deat doch jetz ach noch fehle das mei Muhlje noch krank weat! Im nechte Toach hot dea Muhle iwerhaupt nicks mea gefress. Doa woa awwe dea Mann froh: jetz, horra gesaad, isses so weit. Das fresse hon ich dem Muhle abgewehnt. Blos watte bis ea wite gut is vun sei Krankheit. Awe traurich: noch en Toach druff, un de Muhle woa kaput! Dea Mann hot sich doch verwunnert un gekrisch: jetz woa ich dea Muhle mo so weit hat dass ea net me gefress hot issa mea ach noch kaput gang!
So woas halt mo wie die Leit noch enfache wore un wie se noch net so schlim ufs Geld wore wie Heitzenstoche. Wense ach alsmol was oangestelt hon das woa net so schlim.
Mário F. Glaab
www.marioglaab.blogspot.com

Nenhum comentário:

Postar um comentário