Hunsrickischegeschitje

DE LOGISHE PASTOA

In de deitsche Kolonie is doch schon Allehand passiert. Dat Geschichtje wo eich heit votzehle dat is mo unna de Evangelische un unna de Katholische gewescht. In en Gemeinde do wohre mer Evangelische wie Katholische, un de Pastoa un de Podda hon sich einanne geholf fa die Leit net ohne Gottesdienst losse. De Podda hat viel mer Gemeinde zu behersche wie de Pastoa, desweche war er wenicha in de Kolonie wie de Pastoa. En Toch is mo en Katholick gestorp un de Podda kunt net kumme fa die Beedichung se mache. De Pastoa hat die Leit jo gut gekent, hat sich oangebot fa die Beedichung se mache. Das hat de Familie en gros Freute un Trost geprung. Sie hon andlich gebet un gesung. Ma weis jo net, awa sicha is ach de Vertorwene zefriede gep. Die Familie hon dem Pastoa hezlich gedankt. Dat woa Alles gut un richtich. Wie de Podda das se wisse griet hot wora ach ze friede um dankbar dat sei Kolege so gut woa.

Do is awa dan doch noch was vor komm was net im Plan woa: so poa dumme ruacere sin bei de Pastoa gan un wolte ihn in die Enge treiwe. Sie hon gesad de Pastoa deft doch sowas net mache, en Katholick se beediche! Hon gefrot: “warom hat hier de Katholick begrabt?” De Pastoa hat awa fix un schnell geantwort: “Ai, weil er tot woa”. Dat woa doch logisch un do hatte die Dumme mol die Nose voll.

Glaabmário, aus União da Vitória - PR