DAT SCHLAUE FRITZCHE
Bei uns in der Kolonie wohre doch die Kinne imme gut gezoh, awe alsemol honse doch mol ebbes dummes gemach. Gans hinne am Taquarewald hot doch de Ledeschlappefriedhold gewoht. De hot son Bub, son kleine Lausat, wo imme fa Alles fettich war. Fritzche horra gehees. Die Gurisode hon enfach dat Schlaue Fritzche fa de Lausbub gesoht.
Emol hot dem Fritzche sei Pabbei mol oanbefehlt: “Heit gehst du bei de Poodda un tust ihm mo poo Pinhon gewe; mea honn doch so viel, die Schwein fresse se jo gonet all. Awe sei oanstennich: wen de Poodda kimt dan must du ihn gleich schen griisse, Gelob sei Iesus Christus saad man iwe son en heiliche Mensch wie de Herrpharr. Hoschte verstan?” Dem kleine Fritz hon ach schon gleich de Aue geblinzelt von Freit: im Ort rum strippe, dat wo doch mit ihm. Hot geantwort: “Jo, siche, ich gehn sofort, un ich werte de Poodda gut respektiere. Ich weis doch heflich sen”. Schun horra die Pinhons in en Kerpche uns fot wohra. Dat Schlaue Fritzche is dorich die Strosse gelaaf un hot mit jede ene gemescht. Die Lei hon de Guri gekent, deswege hot keine was druff gebb. Wie dat Fritze an dat Kerichhaus komm is, do hohra ach gleich an de Tea geglingelt: Blin, blin, blin; nochmal, blin, blin, blin. Komisch: dat Fritze wor schon fertich fa de Pharr mit sei gelobt sei Iesus Christus se griisse, awe wie doch endlich di Tea uff gan is, do is dat Fritzche iberrascht wo: dat wo net de Poodda, doch die Schwesta Elizabetta. De Guri hat sich awe net apuriert, hot bische gestotert, awe doch fix gesaat: “Schwesta Lizabett, gegrist seist du, Maria”. Die Schwesta, wo doch imme grinsich wo im Kolech, wie sie das geheat hot un noch die Pinhons im Kerpche gesihn hot, must lache; hot dem Guri gedankt un noch en stick Schokolode zum lutsche geb. Dat Fritzche is abgehau un hot gejuhkst.
So wor es halt wie di Zeite noch net so uhnrein wore, do hon die Kinne ach ihre Artes gemach, awe das hat keene Schoote getun.
Glaabsmario
www.marioglaab.blogspot.com.br
Nenhum comentário:
Postar um comentário