Hunsrick - In der Gute Zeite

Es komt en Briidache!

Voa de Zeite wo die Kinna alles wisse, aach das wasse net wisse breichte, un in de Zeite wo noch viel mea reinichkeet zwische de Leit woa, is mo en Geschichtje passiat wo ich eich  jetz mo vatzehle. Dat kleine Evache, wo doch imma so lieb woa, is jede Toach bei de Podda gang un hat dem vun seine Spilerei, von alles wo in de Schuhl passiat is, vazehlt. Dem Podda, woa groat uff de annere Seit von de Stross gewohnt hat, hat das aach imma orich Spass geb. Eene scheene Toch kommt dat Evache zum Podda un hot mit strohlende Aue un starke Stimm gesoat: “Podda, ich grieche en Briidache!”. Dat woa awwe fa de liewe Podda een Neiichkeet die ea net am watte woa. Das hat ea net glowe kinne. Hot dan mo gleich gefrot: “Na, wie weist du sowas? Warom griest du en Briidache?” Dat Evache hot dan mo erklert: “Vor een Joha hat die Mama mo kranck im Bett geleh, un uff eemol hot es gehes: ‘Eva, du host een Schwestache griet’. Jetz licht de Pappa in Bett un is krank; was soll ma dan do watte?!...” De podda, entwedda er ferschrock wo um dem Pappa sein Kranckheit, must awwe doch noch lache. Soat dan zum Evache: “Nee, ich glawe das es noch bisje lenga dauert bis du een Briidache griest. Un das hat nicks mit dem Pappa seine Kranckhet ze tun”. Dat Evache is heem gan ohne was ze verstehen. Heit komme so scheene Geschichtja iwwehaupt nemme voa. Die Kinna wisse jo alles schun voaraus; un noch zu viel.

Glaabsmário.