Hunsrick - Spessje

DE FRIEDHOLD UM SEI REES NO ROM

De Friedhold, das wo son frohe Mensch, um de hat oach imme so gute Plen gemach. Hot ach imme drohn gegloabt. Wat er sich voagenomm hat dat wolta ach sien im gute End. Awe er hot doch sei Nochba gehat, de Gustav, de wo Hoaschneida woa, de wo doch imme so ahrich pessimist. Jesdesmol wen de Friedhold beim Nochba uf dem Schneidastuhl gehuckt hat un sei grosse Plen voa gebrun hat, dan hat de Gustav schun Alles vermist. Alles wo schwea un unreichbar. Awe de Friedhold hat sich net steere geloss.

En scheene Toach wie de Friedhold nochmol groat so do gehuckt hat uf dem Schneidastuhl sorra iwe de Gustav: “Gustav, wescht du ich will doch mo no Rom reisse fa mo de Popst se beschche”. Dat woa doch bische zu viel fa dem Gustav sei Kunne! De Gustav, so pessimist wie ea woa, hot gleich gebrumt um geknorrt: “Oje, was denscht du, Fridhold: Du noch Rom reisse, um Dan noch de Popst besuche! Dat is doch plet sin. Du woscht doch noch net weite wie bis in unsa Statplaz, un was is das geche en Grosstat? Un dan, meensch du dass de Popst Zeit fa dich het? Du orme Kerl! Bleibt doch schen dehem”. De Friedhol hot sich net viel draus gemach mit dem Gustav sei Abroterei. Ea hat sei Plene un wo siche dafor.

Un werklich: Zwei Monate speta, uff emol komt jo doch de Friedhold nochmol in die Schneiderei, setz sich ach gleich uff de Stuhl. De Gustav hot dan mo gefrot: “Na, warom bischt du schun so lang nimme komm? Is Etwas passiert?” Do hot awe dan de Friedhold es mo aproweitiat, un hot so spettich gelacht un gesaat: “Ei ich soot dich doch dass ich no Rom reisse wollt. Desweche sin ich so lang nimme komm! Heit sin ich nommo mit Leib un Seele do”. De orm Gustav wust in Moment gonet was ea soon sollt. Soll das woa sen? Horra so leis fa sich gedenk. Awe do hot ea mol gefrot: “Naja, un wie woa Dan die Rees?”  “Scheena wie die Rees, blos zwei Reesse!” antwort de Fridhold. “Es is Alles so richtig abgeloof; Alles was ich sien wollt, un Alles was ich mache wollt hat geklapt”. Do is de Gustav doch neigerich woa, hot gefrot: “Ja, un de Popst: host du ihn gesien?” “Awa doch sicha! Wie ea dich kommt is wo ich woa, uff eemol guckt ea zu mich un gebt en Zeiche, ich sollt dichta kumme. Ich hon gement das kent noch fa en Annere sin, awa do hot ea nochmol so mit de Hand gemach dass ich sicha woa. Wie de Heiliche Vadda mich die Hand gedrickt hat wo ich so froh dass ich gonet wuscht was ich spreche sollt. Do Hat de Post oangefan un gesoot: ‘Dreh dich mo rum’, un hat mit seine Hand mitgeholf. Ich hon mich gedreht, wuscht net was das bodeite sollt. Nochmol sorra: ‘Dreh dich doch mo widda’, ich hon es gemach. Awe do hot jo doch de liewe Heiliche Vadda mich gefrot: ‘Na, soo doch mo, wo hascht du dei Hoa so scheen geschnit?!’ Ei, beim Gustav, woa mei Antwot”.

Weil doch de Gustav das net erwat hot, horre mo so leis gedenckt ob sei Pessimismus noch Sinn het. Spesja muss ma jo mache, wenn es ach net so woa is, sonst wet das Lewe jo viel zu enst.

Glaabsmario

www.marioglaab.blogspot.com.br