DE
BEESE PODDA UM DAT FRECHE HANNSJE
Um die Zeite wo die Poddre noch meh Autorited harre um
wo die Kinna aach noch mea Respeckt harre woa jo Alles bessa un scheena. Awa
manchmol is doch etwas passiert wo sich komisch oangeheat hot. Im
Pinhonpikoot, do woa groat mo Unnericht un de Podda wo do fa de Kinna die
letzte Voabereite im Katismus predigge. In zwische de Kinna woa dat Hannsje. Ea woa vun gute
Leit, awa orich frech! Ea hot’re imma mo poo aprontiat. Die Katismuslehrin hat
en Lascht mit dem Kurii. Wie dan de Podda kum is, do hot’se gesoat: “De Podda
is bees; du Hannsje, du muscht dei kanse Frecherei beichte, un sich gut
uffpasse, sunscht gibt’re”. Das woa dem Hannsje alles egoal. Dea hot weite
aprontiat. In de Unnericht hot de Podda oach schun mo bees gemach, un getroht.
Kei Resultat.
Dan is awa doch de Toch kum wo die Kinna beichte
musste. Jetz kommt dem Hannsje sei Stunn, hon die Lehrin un die annere Kinna so
hehlich fa sich gedenkt. Aach de Podda hot bische gespekeliert wan dass dat
Hannesje an de Rei wea. Un do wor ea aach schun am Beichtstuhl. “Patarde”,
sohra. Dat hot doch dem Podda schun uff de Nerve getroff; hat awa gedultich
geantwat: “In alle Ewigkeit”. Dan hot dat Hannsje mo sei Frechheite all scheen
runnagesaat. Dea beese Podda hot sich festgehal fa net die Paciens veliere, dan
hot ea mol so langsam erkleat: “Jung, ich weiss nicht ob wir uns im Himmel
treffen!” Dat Hannsje hot kei Zeit verloa un hot gleich gefrot: “ Ja, Podda,
was hascht du dan so Schlimmes getun, um net in de Himmel kumme? Un kannsch du
net oach beichte un von liebe Gott verzeicht werre?”
So is das vielmols: es is imme leichta de Annere das Himmelstoa zu mache wie sich selwa als
Sinda erkenne.
Glaabsmário
Nenhum comentário:
Postar um comentário