DE KLUCHE EINSTEIN UN DIE SCHEEN BLONDE
Es wor mo emol passiert dat en orich kluche Mann wo so
riisich eglich wor, un wo Einstein gehees hot, sich mo mit so en orich scheen
blondes Medche getrof hat. De kluche Mann, wo jo doch blos an gescheide Sache gedenkt
hot, hat dat Blondes gonet beobacht un seine Scheenheit erst recht net gesien.
Vun der annere Seit awa, dat Blondes hat de Mann mo so gans ongekuckt, von owe
bis unne. Hat so heelich fa sich gedenkt: “ich mist doch dem Kerl mo en
Proposte mache: vieleicht kan das noch en Kilo gewe!” Hot sich mo die Kurasch
genom un saat zum Einstein, wie er groat so bische am zimmeliere woa:
“Entschuldiche, awa stell dich doch mo voa, wen mea zwoi uns heirate tere, dat
kent was Unaausagewehnliches gewe, dei gross Kluchheit un mei Scheenheit
vemischt. En Jung fora de comum. Não é memo?”
Do hot erst de kluge Einstein mo sei Kaffiche
unnageschlickt, gukt mo so iwa sei Bril no dem Medche; net von owe bis unne,
awa noore an die blonde Hoa, un dan erklert er: “Mechlich is das schun, awa man
kan es ach vun der annere Seit guke: was vo en Bist kan do komme wie Resultad
von mei Eglichkeit un von dei Dummheit!”.
Barbaridade! Es is doch schun Allehand uff der Welt
passiert, un fast Alles kan man vun zwei Seite sien. Ma deff halt net schnell
sicha sin iwa das was ma gedenkt hot.
Glaabsmário
www.marioglaab.blogspot.com
Nenhum comentário:
Postar um comentário