Hunsrickisch Schpesje

DIE VERSCHMIATE BUWE

Frija wie die Familie jo noch all so schen deitsch gesproch hon in de Kolonie, do woa das jo alles noch viel enfacha, die Leit sin zusamme gelaaf hun hon Schimaron getrung um iwa das Wetta gesproch, Fackse gemach um sich luschtich velacht. Ach die junge Leit sin suntachs moie gang, hon oach erre Witzja verzehlt.

Do is mo passiat des groat zwoi junge Kelle mo do gehuckt hon wo die Mamai Bosuch hat gehat von de Komodre. Die Komodre, was son schpetich Fraa woa, die hot doch alles benutzt fa Spuchte mache, un die Junge musste imme fetich sen fa net wie die Dumme aussiehn. Wie die Mamai de Kaffi uffen Tisch hat un die ganz Turma oangehest hot, do wore jo doch die Lauskelle bisje nerwes. Dat woa doch das Richtiche fa das spetich Weib. Net lang hot es gedauet un die Junge hatte ach schun das Maul ganz beschmiat mit Sirop un Honich. Die Mamai hot mo geschent: “Kint dea net bessa uff passe! Guck mo wie eia Maul aussieht, dea Schweine!” Oje! Das hat de Komadre groat gepast. Sie soat: Soo? Ich wuscht gonet dass eia Buwe sich oach verschmiere tere.” All muste se lache, un das Schmiererei woa net so schlimm.

Jeder hat sich doch sicha schun mo verschmiat. Gott sei Dank: es gibt jo noch Wassa fa sich abwesche. Wen Heitsenstoge blos die Juchend noch sich so verschmiere tet, dann wer Alles noch viel bessa. Traurich, awe in de Heitiche Toge tut das junge Volk sich mit annere Sache verschmiere, oder bessa, verschweine. Gute un luschtiche Zeite wore das wie die Familie noch bei samme gang sin un hon Schpeschja gemach.

Glaabsmario

Aus União da Vitória – Paranoo

www.marioglaab.blogspot.com