Hunsrikisch Spessje

DER KLUGE PODDA UM DAT FROMME LISJE

            In unsa alte Kolonie hot doch fria dat Lisje gewoht. Dat Fraache wo doch iwerol bekandt weil sie so ohrich fromm gebet hot. In die Kolonie is awa doch imme de Podda Franziskus kum; dea wo en gute Podda; hot awa gen Spessja gemach. Wie ea das se wisse griet hot das dat Lisje so fromm bete kint is er sie mol besuche gan. “Gumoin, Lisje”, sorra. “Wie geht es mit dem Bete? Tut dea fa uns all bete, odde nore fa sich selbst?” Dat Lisje woa gans iwarumpelt mit dem Besuch, un aach mit de Froge, hot en bisje gedenkt, un geantwot: “Gumoin, Herr Podda. Mich geht es gut, un ich tun aach fa die ganse Leit bete, aach fa de Podda. Ich wees jo net epp das gilt weil ich kan jo net die scheene Gebeta mache wo die annere Leit mache, weil ich kann jo net leese. Aach so bete wie de Podda, das kann ich iwahaupt net. De Podda kann bete das ma jo konicks versteht, blos de Liewe Gott versteht jo das” (dat Lisje hot am Latein gedenkt). Do wolt de Podda en Spesje mache. Soot zum Lisje: “Ja, awa zum bete brauch ma jo gonet viel ze soon, noore gute Wille han. Dat wo in Gebetbuch steht, dat muss ma enfach sich se denke, de Liewe Gott weiss jo was ma will. Noore mo andlich gebet, Lisje”.

Naja, im nechste Monat woa de Podda nochmal in de Kolonie, is in die Kerich kum un hot das Lisje in de Bank knie gesien. Es hot so fromm gebet das ma gemeent hat des de Himmel uf de Erde wer. Hot mo uffgepast un gesiehn dat das Lisje so gepischpat hat un mit dem Gebetbuch in de Henn geschwitz hat. No en halb Stun horra dan mo zum Lisje gesaat: “Lisje, du hascht doch so scheen un fromm gebet; sog doch mol, wie hast du das gemach, du kannst jo doch net leese?” Do hat das Lisje awa mo fix geantwot: “Awa Podda, du host doch in dem voriche Monat gesaat ma mist blos gute Wille han, de Liewe Gott tet alles verstehn. Ich hon mei Gebetbuch gepletat un fa jede Ploot gesocht: ‘Liewe Herrgott, du weest jo was do steht, ich weiss es net, awa ich meene das selwige’. Meins du dass das net gegilt hat?” Dem Podda is es gans kalt um de Nawel woa, hot werklich konstatiert dass das Lisje fromm woa un das er noch lache must.

Gute Zeite wo die Leit noch unschuldiche woore un aach noch froha!

Gloabsmário

www.marioglaab.blogspot.com