Historinha em dialeto alemão - Huhnsrück

EN NOCHBA STREIT

Mário Glaab

Dat Stickje wo ich eich heit vetzeele will is mo passiert in unse scheen um lieb Kolonie wo Prunkepicoot gehees hot. Do is jo imma so Allehand passiert, awa Manjes bleibt in dem Kop un ma denkt vielmols dron. Anneres vergest ma un es verschwind in dea Zeit. Dat woa soo: de Miliefuppeshannes un de Batattenikel – die soo geheest hon weil de eene imma soo gen Miliefuppes gess hot un de annere sich die Batatte net fehle gelos hot – woore Nochbre. Honn sich awa imma net so gut verstan. Wenn de eene de annre braucht, dan honnse sich geholf, awa wennse diskutiert honn, dann hat jede eene sei Idee un die must bleiwe. Dea wo annesta soat, dea wo de Dumme. Soo Diskuttione hattese fast jede Suntach, un noch poo mol unna de Wuch. Am En honnse sich alle zwoi dumm geruf: du bischt doch en dumme Tapes. Das hot ma soo vun denne gewuscht.

Im Somma hot es mo so riesich gereent das die Strosse so mechtich glat un aach nore noch Knatsch wore. Dea Miliefuppeshannes must in die Mihl fohre mit sei Wohn, ea must doch Reis scheele losse des die Kinna was se esse hatte. Hatt die Geil oangeschpant un iss los. Bis an die Mihl woret es gut finf Kilomete un die Krake hon dea Knatsch noch mea uffgerriert mit ihre Pratze. Dat iss alsmol gans krum gan, awa ea is hin kum, in die Mihl. Wie ea schun witte am heim fohre wor do must ea uff son eng Platz dorich fohre un extra gut uffpasse dass die Geil un de Wohn net newe hin ritsche dere. Dat woa so glat un geferlich dat dea karrosea es mit da Angscht se tun hat. Hot awa die Rihme fest in die Hen gehal un hot dea Geil gut Wort gewe. Es solt Alles gut gehn. Awa uff emol, wie bestelt, kumt jo doch vun dea annere Richtun dea Batattenikel mit sei Baio. Jetz, was mache? Die Stross woa doch zu eng un hat kei Plaz dass die zwei vonanebei komme kinte. Ene muss aus dea Wech. Wea sol das tun? Do woa doch jede dickkeppicha wie de Anere. Poo Minute honse do gestan un sich mo so enscht oangeguckt. Bis dan hot uff emol de Miliefuppeshannes mo erklert: “kanscht sien dass du aus de Weg komst weil ich tun doch so en Muhle kei Plaz mache!” Dea Batattenikel is gans rot geb, awe do horre gesoat: “naja, ich mache ihm Platz” – un hot sich mit sei Baio uff Seit gemach. Dat hot dem Miliefuppehannes net so richtich gepast, awa ea must scheen ruich bleiwe; ea hat jo doch so dum oangefan. Jeder is sei Weg gan un die Geschichtja sin zerick geblieb.

            Dat worre imma scheene Zeite. Heitzenstoche is es jo Alles gans anneschta – die Strosse sin viel besse un ach die Koleniste fohre blos noch me mit ihre Auto dorum.

Dicionário:

Nochba: Nachbar, vizinho;

Brunkepicoot: Picada dos purungos;

Miliefuppes: Maisbrot, broa de milho;

Suntach: Sonntag, domingo;

Wuch: Woche, semana;

Tapes: Toll, doido;

Mihl: Mühle, moinho;

Wohn: Wagen, carroça;

Krake: Pferde, cavalos;

Heitzenstoche: hoje em dia.

Pratze: patas (dos cavalos);

Dickeppich: cabeça grossa (dura).