Historinha em Hunsrick

Schoat dass du es net groat so mache kannscht!

Mário F. Glaab

Frie woa dat doch alles imme so schen uf dea deitsch Kolonie. Die Leit hann sich doch all gut verstan, un hon sich imme geholf, wo was se helfe woa. Hon sich oach imme Suntachs in de Kerich un wo en Vergnicheplatz woa getroff. Dan honses andrich gebet un aach gebrost. Die Juchend hot Bolageschpield oder Karere gesprung; die eltere Leit hon Korte oder sunscht was fa Zeitvotreib geschpield. Un die Weiwa, oje, die hann jo doch die meascht Zeit blos Schimaron ingeschenkt un iwa die Annere gesproch. Dat woa awa net so schlim. Hatte sich all gern.

In dea Kolonie honn ja imme katholische un evangelische Leit beisamme gewoht; die honn sich all in Religionssache orich respecktiert. Vielmals sin’se, eene beim annere, in die Kerich gan. Haupsechlich wen een Beedichung woa: wend dea Verstorbene een Katholick woa dan sin die Evangelische in die Katholischkerich kum; wen es een Evangelische woa dan sin die Katholicke in die Evangelischekerich kum. Awe wie das doch imme is, hie un do hon’se sich bisje gepetz. Wen de eene de annere bisje spielhaft nemme kunt, dan hare es aach aproweitiert.

Een Toach isses grat mo so passiert dass de Pastoa un de Pooda sich him Zuch getroff hann. Gleich honnse bei nanna gehuckt un vazehlt. Die Rees wa ja lang un dea Zuch iss in der Zeite net schnell gefoa. Gebabeld und gebabeld; wie es dan mittach woa is do iss es so schrecklich hees gebb. Die zwei hon oangefang se schwitze dat dea Schweis geloof is; dat woa traurich! Die Sunn hot imme meh zum Fensta rin gebrend. Uff eemol geht de Pastoa groat mo bisje fot, un dan kim’da mit dem Jacke in de Hen, soat zum Pooda: “Schoat das du es net groat so mache kannst!” – die katholischepoodre muste jo doch imme, in der Zeite, mit dem dicke Mantel gehn. Leit, woa das mit griet hon, hon sich velacht. Dea Pooda must halt ruhich bleiwe. Net lang hot es awe gedauert, do iss dea Pooda mo ins panhere gan. Uff eemol komt ea zerick un hot jo doch die Hoose in dea Henn; soat spetich zum Pastoa: “schoat das du es net grat so mache kannst!” Do hon die Leit sich nochmol richtich velacht. Zum End hon die zwei Religiesischemenna halt oach mitgelacht. Jeder hat sei Witzje gemach un aach sei Trock griet.

Dat ware die gute un schene Zeite wo die Familie so schen gelebt hon; die Evangelische un die Katholische noch fromm wahre un alles gute Christe ware. Es wer doch so gut wenn heit die Juchend die Werte vun de eltere Leit nochmol finne dere, un net blos in der Stadt un in de Internet ihre Zeit vertreibe dere. Die Religione, Katholisch un Evangelisch, hon noch viel fa de Mensche se lerne.