Hunsrick - zu Advent

DE ADVENT IS KOM!

Nochmol em Advent is kom. Nochmol tun die Lichta in unsre Hetza sich erneire. Die Keriche, die Heissa, die Gadre un die Stette tun sich mit Lichta beleichte. Die ganze Lichta wo ma so siehn kan, tun awa net die Lichta substituire wo in de Hetza vun unsre Kinna sin, in der Hetza vun de Weiwa un vun de Menna wo an die grosse  Schenheit glowe das Got zu de Mensche komt, in dem Kindfigua: das Kind vun Nazareth.

Die Toche sin lan un ohrich genehm. Die Familie gehn in die Strosse. Die Leit loofe so despreokupiat dorum, blos fa se loofe. Die Kinna hupse un singe; alles tut sich in Freite begleite. Es is en Gnadezeit. Der Herrgott is unna uns. Wen aach die Geschefta das alles so extra exploriere, kinne awa die Freite un die Hofnun, wo weita wie de Konsumismus geht, net verstekelle. Wieviel Treffe, wieviel Griisse un wieviel Abrasse? Groat do tun die Spannunge sich renowiere. Do tut das Lewe sich nei mache. Ketze am blinke, Lichta am brenne; dunkele Hetza tun sich erleichtre un hatte Hetza were weich. Wieviel kleine Geschenkchaa were ausgeteilt, wieviel Leit were errinart? Oach viele Verstorbene komme in die Gedanke, un grieche Blimcha uff erre Grewa gelecht. Es is das Lewe wo in de Liwe sich weita macht wie de tot – is de Lewendiche Gott bei seine Freinte.

Advent, Zeit zum watte um neie Manifestatione vun den Retta. De Retta zeicht sich in dem Lecheln, in de Teilunge zwichich de Orme, in de Geschenka wo verteilt were, in de Gesichta vun de Brida un vun de Schwestre, haupsechlich in dem Lewe wo geteilt wet. Die Lieda, die Ritme vun de Lieda wo die Weihnachte schun anzeiche, es is kei Zweifel mehr: de Herr komt! Jede Sunntach, dat in de Kappell odde in de Katedral, die Adventketze were angestoch: die Escht, die Zweit, die Tritt, un die Viat. Jetz heat ma schun die gross Botschaft von dem Engel: “Ich tun eich en gross Freite brenge, wo aach fa alle Velke so is: heit, in de Davistat, is fa eich de Retta geboa, de wo de Herr Kristus is!” (Lk 2,10).

Advent. De Wunsch um Friede, Gesundhet un Freide tut sich nei mache. Die Grisunge soon es mit grosse Sin. Wo wonht de Friede? Dat im Hetz vun Jede de das Kind wo komt oan nemme tut. Die Hetza wo erhitzt sin mit dem wohre Licht, mit dem Liewefeia aus Gott, die Hetza tun unsa kalte Welt, son hatt Welt, son kropp Welt un son ungleich Welt nei mache, in en Welt mit Hitze, mit Zetlichkeit, mit Friede un mit Gleichkeit, wo es kei Schmetz, kei Traue, kei Trene me gewe tut; awa blos noch Freide un Liewe, weil “Got is Liewe” (1 Joh 4,9), un imme zu uns komt.

Scheene Adventzeit un frohe weihnachte.

Glaabmário

www.marioglaab.blogspot.com.br