DE GUTE FLEHLEOPOLD
Friia wohre die Leit noch net so geleehat iwa die
Ekologieschegechichte wie heit, awa es hat doch imme schun gute Leit gep wo das
schun im Blut hatte. Bei uns in de Kolonie hot doch de Flehleopold gewoht; dea
hat so gehees weil ea es imme so mit de Fleh ze tun hat. Dat wo soo: die Leit
hatte jo all imma meh Fleh wie Alles wet hat, doch must Jeder siehn wii ea
durch komm is. Die Kinna hon doch demerscht demit gelitt; kundte doch bald net
schloofe weil de Strohsack un die Decke so voll von denne Diere wohre dat Alles
blos noch me gejuckt un gebiss hat! Aach unnam helle Toach hon die Bista
allsmol in de Buckel gshtoch odde aach in die Bein, un wea weiss, wo sunscht
noch iwerall! Dat woa traurich, mit denne verflickste Huppsa.
De Leopold hat das ganse haus volla Kinna, un die Fleh
hon blos kei iwahaupt genomm weil ea do hii un zu mol die gans Wesch vobriiht
hot mit heis Wassa. Dat hot ea so gemach: hot en grosse Kessel mit Wassa heiss
gemach, un wenn das Wassa mo heiss genuch woa, dan hot ea die Leinticha, Decke
un alle Kleidde mo in’s Wassa gedrickt. Wen ea nochda das Zeich ausgedreht hat,
dan sin die gaputne Fleh do geschwom. De Leopold woa awa doch en gute Mensch,
ea wolt doch kei Diache kwehle. Desweche hot ea imma not uff alles, aach uff
die Fleh. Ea soot imma: “ma kann doch kei Dia kwehle, wenn es aach en Floh is”.
Desweche hat ea net geloss dat das Zeich in das kalte Wassa getun woa iss, un
dan lagsam heiss gemach woa iss. Ea sot das wea Diakwehlerei, un das deft ma
net mache. Die Lei wo das wuschte hon sich bewunnert un hon gesoat: “De Leopold
iss doch werklich en gute Mannskell”. Desweche hat ea aach dea Nome kriet: De
Gute Flehleopold.
Vielmols wohre die Friirischeleit net so geleert wie
heit, hatte awa meh ekologische Sinn wie viele Heitzenstoche wo se Alles do
bereit hon.
Glaabsmario
Nenhum comentário:
Postar um comentário