DIE KUH BEIM STIE
Mário Fernando Glaab
Dat Geschichtje wo eich schreiwe iss passiert in der frierische Zeite, friea wie dat Alles noch scheena woa un wo die Leit sich all besse verstan hon. Friea woa Respeckt un Oanstand unna de Leit. Oje, die Buwe un die Medd die wore so gut gezoh dat sich selte mo eene vetorpt hat. Heitzenstoache iss das jo Alles annersta. Die Leit hon kee Bildung mee; die Juchend iss doch alles blos noch mee son Zores!
Also, in de schene Zeite un in de kleen Kolonie iss es mol so passiert. De Podda, son richtiche respecktierte Mann, iss viel unna sei Volk rum gelaaf. Hat jede Familie un jede eene mit Nome gekent. Er selbst hat P. Friedholt gehest. Die Mensche uff de Stroos honnen all nur as Podda genent. Een schene Toach iss ea groat mo so dorich die stroos gelaaf um sei Spaziergan se mache. Do horer sich mit dem Lisje, een seha hibsches Meddje, oangetrof. Dat Lisje woa awa etwas komisches am tun: sie woa en Kuh mit een Strick am fiehre. Dea podda wolt aach gleich wisse wo dat Meddje mit de Kuh hin wolt, un hot gesaat: “Gumoin, Lisje. Na, was machs du? Wo fohrs du die Kuh hin?” Dat Lisje, mit allem Respeckt von Podda, hot earst mo scheen gegrist: “Gelobt sei Iesus Christus, Herr Podda”, un dan geantwort: “Ei, ich will die Kuh beim Onkel Kaspa sei Stie tun. Die Kuh is stierich un mea hon doch kei Stie”. Dat iss dem Podda bische krum kom. Hat es en Orwet fa Menna gemeent un net fa so en uhnschuldiges Meddje. Wie ea es en bische verduckse wolt hat ea gesaat: “Awa liewes Lisje, kennt das net dei Pabei aach mache?” Es Lisje hot net lang nogedenkt un hot geantwat: “Nee, Podda; das kann blos de Stie!” Verflickste donnerwette, sowas hat de Podda awa werklich net gewoat! Ea hat im Moment net gewuscht ob ea lache ode schenne sollt. Iss rooth gebb un hot blos noch gemurmelt: “Adie, Lisje”. Un fot wor ea. Iss um die Kurve gerent dass sei Mantel andlich geflackat hot. Un hat so helich fa sich gedenkt “wen doch blos das Lisje es net bei de andere Leit soot”. Es Lisje hot sich bewunert dass soon gescheite Podda so dum frohe kennt. Un so woret hal mol in der Zeite wo die Leit noch enfache wore.
Heit passiere so Geschitja nimme weil es gans annescht iss. Erstens, die Juchend tut doch nemme son Orwet mache; zweitens, es iss doch kei Respeckt me unna de Juchend. Wen ma Heit’zenstoche mo die Kelle beobacht dann schemt ma sich jo vun sich selwa. Mea Alte kenne do nimme mit.
Nenhum comentário:
Postar um comentário