quinta-feira, 16 de fevereiro de 2012

Historinha em dialeto alemão - Huhnsrück

DIE FROMME LEIT VUN MILIONEVETTEL
Mário Glaab

In dea gute Zeite wo schun lang rum sen is Allehand voakom. Die letscht Wuch honnich mo nochmol nogedenkt wat mei alt Modda vun ihre Kolonie gesoat hot. Die Modda hat in en Kolonie mit ihre Eltre gewohnt wo Milionvettel gehes hot. Dea Nome hat das Platz so gried weil do so Leit wore wo so scheen prose kunte, wie de Modda imme saad: wenn die mo geprost hon dann isses Wasse goloof! Milionevettel woa so viel gemeent wie 250 Tausent – viel Geld. Jeder, wense aach so ormche wore dasse blos noch Bohne, Manhok un Bowre hatte, hatt awe vom dem viele Geld gesproch wo ea in neschte Joa grieche soll wen ea sei Schweinje vekaafe tet. Dat solt en gans Milionevettel gewe! Sogóo die Kinnecha hon schun unna sich geprost. Oie, honses gesaat, unsa Pabei dea hat so grosse un fette Schwein dasse gonet all uff de Kaminion passe. Dea Schlachta muss mehamols komme un die Wutsja schun dehem im Stall kaputmache, in Stikacha schneide un dan uff de Kaminion! Dat wor doch schun bisje ze viel; awe es woa so.
Dei Modda hot jo lang in Milionevettel gewohnt: ihre gans Kind un Juchenheit. Dann hotse jo viel se wisse griet wie dass Alles abgelaaf iss. Sie soat dass alle zwoi oder droi Monate dea Podda in die Kolonie kum iss fa die fromme Leit relichiesisch se bediene. Die measchte wohre jo doch gute un fromme Mensche. Wen dea Podda kum iss dann must ea jo Alles mache: die Kinnacha unnarichte, die Toafe mache, die Beichte hehre, Hochtzeite mache, Mess halle, Heisa und annere Sache weihe, un so weite. Do braucht ea imma zwoi oder sogóo droi Toache fa die viele Ufgabe. Das woa imma en gross Freit wen es gehees hot dass in dea nescht Wuch de Podda do senn soll. Jeder wolt dem Podda was gewe fasse esse. Die measchte hon Hinkele geschlacht fa en Galinhode se koche. Dea orm Podda must so viel esse dessa als bal dick woa is. In dea Winttazeit honse dem Podda die bescht Decke uffs Bet geleet, un in de Kich woa imma das Feia am brenne. Gute heise Schimaron hot oach keene gefehlt. Im Somme woa es net so leicht es dem Podda bisje beqem mache. Die Hitz kanma jo net leicht Frisch mache.
Emol isses mo in Somme so passiert: Dea Podda hot bisje mea Zeit gehot un das woa so schrecklich hees. Do horra mo etwas in die Gedanke griet. Es woa doch net weit bis an die Rio – en scheene sauwre Rio, un das Wasse so gut frisch -, do kind ma doch mo sich bisje bóote gehn. Awa wie kan dea Podda fun dea Leit wegkomme fa an die Rio sich bóote gehn? Die viele Leit, haupsechlich die Weiwa un die Kinna, kinne das doch net sihen wen en Podda ins Wasse geht. Was mache? Awe ea hot en Idee griet: de Nikla, en Voninftiche Jung wo doch imma em Podda de Gaul gessatelt hat un imma hilflich wo, dea mist en Rodd wisse. Gleich hatta aach mit dem Nikla gesproch. Hot ihm gesoht vun sei Wille un aach sei Problem. Dea Nikla hot mo bisje gedenkt un dan geantwot: “Ich het en Rodd: dea Podda soad iwe die Leit sie sollte mo de Rosekrans beete fa die orme Sinda un dan noch een fa die orme Seele im Fechfeie. Solle mo en scheen Buss tun, all mitsammem Menna, Fróoleit, Juchend un Kinna; dea Podda kent net debei bleiwe weil er het was vergess un mist es schnell hohle geen.” Die Geschichte hot dem Podda intressiert, obwohl dach liege net so richtich gepasst hot. Awe dass woa doch so heis, un dea Podda woa jo doch oach nore en armseelige Sinda wo sich mol en halb Stun etwas erfrische wolt. Also…
Gleich woa die Ordnung augebreit. Iha Leit, kommt all hea: dea Podda will hon dea sollt mo mechtig beete, all mitsamme! Eniche wollte noch was froche, awe de Herr vun haus hot fix un schnell oangefan. De nikla un de Podda sin ach gleich hinnam Schweineschtal runnagerent bis an die Riosbaranke. Um die Zeite hat es doch noch kei Kalson geb, wie sollte dea Podda un de Nikla ins wasse? Wie Adam un Ev, dass wollt de Podda doch net. Hat fix sei Mantel ausgezoh, die Hoose un das Unnahim sin nore noch gefloh. Do hatta mit sei Unnahose gestan. Das hat jo net scheen ausgesihen, awe keine solls aach sehn un se wisse grien. Dea arme Nikla hot doch iwehaupt bei son heisses Wetta nicks unna de Hoose gehat. Ea sollt jo do stehn bleiwe fa en bische ufpasse des keine komme tet fa se spekelier, awe die Versuche wore zu gross. Ruk zuk issa ins Wasse gesprun. Sei Kerwa woa verschwun bis owe die Brust. So hon die zwoi sich mo scheen kiel gemach; hon aach geschwom wie Fisch. Awe uff eemol! Eemol honse was geheat an de Baranke. Dat sollt net woa sen: do honn doch Leit gestan un geluert. Barbaridade! Wie es halt imme so neigeriche Leit gebt, worere wo die Geschichte net so gegloobt hon un sin mo guke gang wo de Nikla mit dem Podda ihn wore. So was! Die zwoi hatte doch son bang sie dere nackich gesihen were. Das deft net passiere. Dan sin sie bis an de Hals ins Wasse gedaucht. Hon awe oangehal die Leit solte fot gehen, das Wasse wer doch schun kalt. De Neigeriche hot das noch Spass gemach, dea Kinna und de Junge escht extra. Do kommt wie en Plitz de Leopold - Leopold woa doch en geerte Mann wo doch imma de Podda um Haus hat, un aach in sei Haus is die Mess gehal geb. De Leopold hat awa mo geschendd un hat die Leit all fotgejóod. Das wea doch mol unaoanschtenich, horra gessot, de Podda se lure wen ea doch blos in bootezeich is. Die Leit solte all sofot ruff un en Strof grien. De Strof woa noch en ganse Rosekranz knient beete, un zwische jede Geheimniss um Gottesverzeiung bitte. Wie das Volk von de Baranke weg woa sin die zwoi aach gleich raus un nicks wie schnel heim un sich richtig trocke gemach.
Das is bei de Fromme Leit von Milionevettel passiert. Das woa jo Alles net so schlimm, die fromme Milionevettla hon ihere Glowe net veloa, gans bestimt isse noch gresse geb. Guute Zeite!

Dicionário
Prose = Gabar; contar vantagens;
Pabei = Papai;
Wutsja = Porquinhos;
Modda = Mãe;
Podda = Padre;
Heisa = Casas;
Wuch = Semana;
Galinhode = Galinhada; arroz cozido com pedaços de galinha;
Bequem = Conforto; confortado;
Rodd = Sugestão; conselho;
Sinda = Pecadores;
Eniche = Alguns;
Kalson = Calção;
Geluert = Espiando;
Neigeriche = Curiosos;
Geschendd = Xingar; xingou;
Unaoanschtenich = Vergonhoso; feio;
Lure = Espiar;
Milionevettla = Habitantes de Milionevettel.

Nenhum comentário:

Postar um comentário